北歐之旅 - DAY1 香港 -- 赫爾辛基 -- IVALO *北角 NORDKAPP*

 

當日我哋準時六點放工，返屋企執拾埋d手尾，再到樓下食咗個MCDONALD之後就開始出機場﹗
我哋搭芬蘭航空零晨0025班機由香港飛往芬蘭首都赫爾辛基，因為我哋參加旅行團，晚上10點便要到達機場集合，最終我哋遲咗十五分鐘先到......

雖然足足提早咗兩個半鐘頭，但一輪閒逛、聽領隊講解、過關後，好快就已經需要去到閘前等上機﹗



實在係好興奮，亦好緊張，因為今次係我第一次搭十幾個鐘頭飛機，我真係好擔心自己頂唔順......點知原來架機個冷氣系統壞咗! 所有人就係咁等個冷氣整返好，成個鐘之後先起飛。最慘係個冷氣整好之後超凍，搞到我都無覺好瞓......

到達時間赫爾辛基係當地的0625 (即香港時間1125)，足足坐咗11個鐘頭飛機，對我嚟講真係一項創舉!!


一踏入赫爾辛基的關境，見到的大部分關員都是靚仔﹗真高興!! 

過完關後我哋要响機場等到1040再轉搭內陸機到芬蘭北面IVALO，大概4個鐘頭的時間，唯有响機場閒逛同影下相.....

機場已經有間MOOMIN SHOP，我至愛的姆明!!

仲有熊罐頭、鹿罐頭同聖誕老人罐頭

時間尚早，機場人影都無

機場周圍都有插頭，好方便，好適合我哋呢d 又帶iPHONE，又帶NOTEBOOK，又帶遊戲機的香港人~~唔怕等轉機時玩晒D電!

閒逛完 --- 周圍影完相 --- 老公再打多陣機 ---- 我就煲多陣韓劇，終於係時候上機啦!!

起飛~~


搭個半鐘頭機，我哋到達IVALO 機場!

IVALO機場 - 一眼睇晒!


之後就正式開始我哋第一天的旅程!

(待續)