獅媽手記 の 最新近況

原來都有差唔多兩個月冇更新呢個BLOG.....因為屋企發生咗好唔開心的事.....

一月底時公公突然病咗，肺炎入咗醫院，响醫院住咗四日，公公就話要出院，醫生見佢有好轉，就比佢出。點知返到屋企藥又唔食，漸漸連食物都食唔到.....

有一晚開始呼吸唔順，婆婆就立即帶佢去急症室，發現肺炎嚴重咗.....一開始時加重抗生素，我哋每日探佢時都好似有d好轉......點知年廿九，醫生突然打電話嚟，話公公的肺炎誘發咗心臟病，個心開始有問題.....最後公公响年初三返上天堂，回到天父的身邊.....

每一次想起公公，心都好痛，老人家真係可以話走就走......公公無病無痛行得走得時，我哋無特別關心佢.....所以話每個人都「愛得太遲」，無咗先識得珍惜，真係好正確.....

好彩係有小獅B、小吉、傻豹三隻小豬响度，响呢段咁艱難的時期，帶比我哋歡樂。

每日婆婆到我哋屋企，同獅B玩下，希望佢可以忘卻悲傷.....

傻豹都立即回到婆婆屋企，陪下婆婆，等婆婆唔好自己一個人亂諗嘢.....

而家獅B 响屋企周圍爬，一路扶住d嘢四圍走，一有機會......就去玩小吉個水兜 -__-!!

獅B同小吉接觸多咗，小吉由一開始有d抗拒，到而家漸漸有d接受.....

我慢慢再POST佢哋d好笑嘢比大家笑下~~