第一次帶B遊 の 九州之旅 DAY1

十月忙的最後一件事，就係去九州旅行囉~~~

獅媽主要掛心獅B上飛機會唔會大喊嘈親人啊、有冇帶齊獅B d嘢、每日獅B三餐，仲有出遊時帶備的隨身物品之外，基本上個行程的安排係無乜理到........

所以就亂咁走亂咁玩，有好多失敗之處，仲要揹住獅B趕頭趕命趕搭車，獅媽SHOPPING 時間無晒，獅爸無啦啦受傷了.......等等等等

哈哈....無經驗係有D缺失啦

雖然行程無咩特別，又論論盡盡，但都同大家分享下第一次帶小朋友去旅行的實況啦

我哋搭HK EXPRESS 13:05 機，所以朝早可以瞓飽先起身，大概10:00 先出門口到機場

出發前餵小吉食魚干仔先~~
拜拜啦小吉，五日後再見啦!!

由於有兩件行李，一件小手提，一架BB車，各自一個背囊，再加一個BB。所以我哋選擇搭的士出機場。
點知……獅B搭搭下就瞓起上嚟，獅媽心下一沉……弊啦，淨間上到飛機，佢咪好精神!! (又擔心咗一輪......)

CHECK完IN 上機前，醫飽肚先，因為廉航無嘢食嘛......

食飽飽就出境，先到閘口附近

因為太擔心獅B會响飛機上大叫大喊扭計，所以呢個時候先比佢周圍跑下消耗下體力先.......希望佢上到飛機會瞓......

跑完一輪先去排隊BOARDING
照舊獅媽帶埋小傻去旅行，但貓鬚太吉，獅B好嫌棄!!

要搭程巴士........獅B好似好興奮咁喎~~

好明顯，獅媽之前過份擔心啦~~

等起飛時，要獅B坐定定咁耐係有d難度。我一路比乾果佢食，同埋新玩具，就係咁食下玩下......

起飛咗一陣，就乖乖入睡~~

今次五日四夜的行程，會去由布院同熊本，所以我哋都有買呢個JR 九州PASS

HK EXPRESS 有呢個優惠，我哋買咗北部3天
(未去前上網搵個價錢都唔UPDATE)

因為有BB同行，所以過關時職員好好咁比我哋排快隊。拎完行李後，就帶獅B換尿片，原來之前排快隊換來的時間係用嚟換尿片用的.......

出機場後要搭接駁巴士到地鉄福岡空港駅，狼狽就正式開始了......因為有兩件行李+BB車+BB，上巴士嗰一級實在好狼狽，再加上獅B唔鐘意坐架士的車，周圍又多人又迫又黑，所以响巴士上一路喊扭計，點氹都無用 >__<

幾經辛苦先搭完嗰幾分鐘車程，我第一次一個人抬起架BB車+獅B 落巴士!! (因為人太多獅爸已被迫到車頭離我哋好遠，同埋佢都要顧住嗰兩件行李)

落車後決定揹起獅B，我推一件行李，獅爸推另一件再揹起架BB車
好明顯，一路手忙腳亂根本影唔到相!!

終於行到去福岡空港駅，由呢度搭去博多駅 - 260円

响博多駅的JR 櫃位換JR PASS時，發現到由布院的列車指定席已全部售清，莫講話由布院の森，連普通的直通車都無晒，一大打擊!!! (應該係因為嗰段時間亦係日本假期所致.....)
唯有返酒店再慢慢研究點算好.......

今次我哋間酒店超近車站，响博多駅筑紫口一出，已經望到。
不過酒店樓下係彈珠店，佢自動門一開，就勁嘈勁大聲，每日一出一入，獅B都拍晒心口表示驚驚.....

CLIO COURT HAKATA ホテルクリオコート博多

http://www.cliocourt.co.jp/