勝博殿日式炸豬扒 + 心洞

4月4日清明節，除咗去拜山之外，仲買咗飛夜晚去睇蘇玉華的心洞

下晝拜完山之後，我哋先去銅鑼灣行陣街先，去咗FOREVER 21，嘩....多人到呢，雖然知道價錢唔貴，但都唔駛好似唔駛錢咁ga......

之後未到六點就去食飯，去勝博殿食炸豬扒，因為未到六點未開，所以响周圍行咗一陣，大概6:05返去， 已經坐低咗好多人，大概有半個餐廳。再坐多十分鐘，已經見到好多人等位，所以建議大家六點去就唔駛等位啦~~

因為都仲好早，所以我哋三個人諗住只叫兩個餐，點知個侍應話唔得

個侍應只係不停講，公司規定，如果3個人只叫2個餐係需要另加$58 + 前菜(椰菜)&飯&麵豉湯。我哋只好表明我哋其中一個係唔食椰菜&麵豉湯，咁加嚟做乜。但個侍應只識不停重複話係公司規定，我哋話叫多個小食都唔得。究竟點解有呢個規定，佢講極我哋都唔明......最後講講下我哋叮咗一下，會唔會因為前菜同飯都可以添加，所以如果我哋只叫2個餐，添加前菜同飯佢哋會覺得蝕咗呢 所以我哋就話如果我哋唔需要添加，係咪可以就咁叫2個餐呢，個侍應即刻答"可以"  

而家啲人的表達同應變能力真係好差，我哋都話明有人唔食椰菜囉，我哋又點會去添加呢，迫我哋加$58要d唔食ge嘢，我哋又點會接受呢.......

唉，算啦......叫咗個千層錦套餐& 元祖三色豬柳卷套餐，真係好好味，炸物的脆醬好鬆化，我個friend 話好食過銀座梅林 (正確嚟講佢係話銀座梅林唔好食)


前菜 — 一大兜椰菜 (可點芝麻醬/柚子醬) + 漬物&青瓜


另有一碗黑白芝麻，比大家鐘碎之後加醬汁點豬扒的

千層錦套餐 — 千層錦 + 忌廉蟹肉餅 + 炸蝦 (個千層錦有啲肥豬肉，所以覺得麻麻地，下次都係食炸豬扒先得。不過呢個千層錦係期間限定的，好似只會到五月)

元祖三色豬柳卷套餐 — 三款豬柳卷﹕芝士/露荀/梅子 (個梅子味好....酸)

可能始終炸豬扒製作需時，所以搞到我哋由銅鑼灣去藝術中心都有啲趕，加上金鐘地鐡站去藝術中心條路改咗，我哋差少少就要過咗第一節先入得啦.....真好彩

開頭都有d驚睇呢類比較正經的劇會忍唔住瞌下眼瞓 (始終行咗大半日+啱啱食飽飯)，但最終都無。可能壽臣劇場比較細，表情睇得較細膩所以都好投入。幾位演員做得出色都唔駛特別講啦，睇完之後絶對可以令人好好反思......