兩次不快經歷 (上)

清明+復活節長假裡，去咗兩間餐廳食晚飯，但兩間的服務態度認真嚇人，所以寫出來比大家參考參考一下。

(一) 馬鞍山新港城中心一間食類似越南嘢的餐廳 (响板長同茶軒隔離)

我哋叫咗一個2人套餐，$14x，雖然唔係好貴，但亦都唔平囉，並唔係大排檔價錢
套餐包括﹕
沙律 — 有鳯尾蝦 / 春卷 / 蝦餅揀 --> 我哋揀咗鳯尾蝦
主菜 — 揀2款 --> 我哋揀咗馬拉盞炒通菜 & 無骨海南雞
白飯 x 2 + 飲品 x 2

首先嚟咗2杯嘢飲&馬拉盞炒通菜，過咗一陣都冇話自動上飯，要我哋叫上。
之後嚟埋海南雞
最後就嚟咗一碟春卷，旁邊有d碎椰菜 (比平時伴菜更碎的菜)

個侍應一放落嚟，老公就即刻話"唔係我哋ge，我哋冇嗌春卷"
傳菜想拎走，同時又問"你哋嗌咗咩"
"我哋嗌咗鳯尾蝦"
跟住傳菜再睇下盤上張單，竟然同我哋講"唔好意思，呢個就係鳯尾蝦"
我哋心有不甘，"呢個係鳯尾蝦????"
傳菜好肯定咁答"係﹗"，跟住就走咗

我哋回過神之後，我諗諗可能人哋個鳯尾蝦係真係咁樣，但老公唔甘心，決定搵個侍應嚟問下。
叫咗個女侍應埋嚟，問"呢碟係咩嚟?"
女侍應即刻答"係春卷"
我哋當然火都嚟埋，"我哋係叫鳯尾蝦ga 喎...." ，都未講完，個女侍應乜都冇講就行開咗......
之後隱約聽到個女侍應同另一個(應該較高級的)講"咩叫咗鳯尾蝦喎....." (態度好到呢....)

過咗一陣個高級的行過嚟，話唔好意思，比錯咗個春卷我哋，話換返比我哋
但我哋真係忍唔住，好明顯我哋一早已表明佢係上錯菜，但個傳菜完全冇理，仲要好肯定話碟春卷係鳯尾蝦﹗﹗﹗﹗真係痴線架~~
對方只話唔好意思，個傳菜唔係成日响呢度返工 ，咁ge藉口都得﹗唔認得d菜識唔識問下人啊??
最後覺得繼續鬧都係嘥氣，所以叫佢快快換返啱就算

點知，轉個頭返嚟話比我哋知原來是日冇鳯尾蝦﹗﹗﹗﹗

呢間嘢真係好有問題
- 冇鳯尾蝦，冇人知會我哋改單
- 自把自為轉咗上春卷，傳菜單照寫鳯尾蝦
- 傳菜員冇理客人投訴，唔識又唔問下人，响度亂咁講
- 侍應態度奇差
- 碎濕濕的菜當係沙律 (我哋冇食到肚痛真係算我哋好彩)

根本個2人套餐的份量就唔足夠2人食，除咗飯同飲品係絶對足夠之外，個海南雞得個4-5塊、個蝦餅(最終轉咗蝦餅)得一舊 + 如伴菜的碎濕濕椰菜，呢d 份量只夠一人食﹗竟然要收我哋$14x 再加一﹗﹗﹗

當然我哋唔會再去食，仲要話晒比所有親戚朋友知﹗﹗